ភ្នំពេញ៖ អង្គការមជ្ឈមណ្ឌលជីវិតរស់នៅដោយឯករាជ្យនជនពិការភ្នំពេញបានប្រកាសគាំទ្រការធ្វើវិសោធនកម្មរដ្ឋធម្មនុញ្ញជាលើកទី១០ ដោយថាពួកគេមានជំនឿទុកចិត្តលើរដ្ឋាភិបាលដែលដឹកនាំដោយសម្តេចតេជោ។

ក្នុងញាត្តិគាំទ្រចុះថ្ងៃទី៣០ ខែកក្កដា អង្គការមជ្ឈមណ្ឌលជីវិតរស់នៅដោយឯករាជ្យជនពិការភ្នំពេញ បានប្រកាសគាំទ្រចំពោះការអនុម័តរបស់រដ្ឋសភាលើសេចក្តីព្រាងច្បាប់រដ្ឋធម្មនុញ្ញនេះ និងបានសម្តែងនូវការប្ដេជ្ញាចិត្តការពារថែរក្សាសន្តិភាព និងដំណើរការដឹកនាំជាតិមាតុភូមិរបស់រាជរដ្ឋាភិបាល ដោយមិនកម្លាំងអមិត្តណាមួយមក ប៉ះពាល់បានឡើយ។

ក្នុងញត្តិនោះលើកឡើងថា៖ «ជាការពិតណាស់ រាជរដ្ឋាភិបាលកម្ពុជា ក្រោមការដឹកនាំប្រកបដោយភាពឈ្លាសវៃ ភាពប៉ិនប្រសប់ និងគតិបណ្ឌិតរបស់ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានដឹកនាំជាតិមាតុភូមិស្របតាមរដ្ឋធម្មនុញ្ញ ដែលជាច្បាប់កំពូលរបស់ជាតិ ហើយការស្នើសុំធ្វើវិសោធនកម្មច្បាប់រដ្ឋធម្មនុញ្ញនេះជាការបំពេញបន្ថែមនូវចន្លោះខ្វះខាតនៃរដ្ឋធម្មនុញ្ញ និងដើម្បីធានាការពារនូវស្ថិរភាពនយោបាយ ភាពមិនជាប់គាំងនៃស្ថាប័នជាតិឱ្យដំណើរការជាប្រក្រតីដោយរលូន និងមាននិរន្តភាពគ្រប់កាលៈទេសៈ ក្នុងគោលបំណងសំដៅការពារនូវឧត្តមប្រយោជន៍របស់ប្រទេសជាតិ ប្រជាជន ជាពិសេសបងប្អូនជនមានពិការភាពនៅក្នុងព្រះរាជាណាចក្រកម្ពុជា»។

គួរឲ្យដឹងផងដែរថា រដ្ឋសភាកម្ពុជាបានសម្រេចអនុម័តទាំងស្រុងធ្វើវិសោធនកម្មលើកទី១០ នៃរដ្ឋធម្មនុញ្ញកម្ពុជាបន្ទាប់ពីបើកសម័យប្រជុំពេញអង្គលើកទី៧ នីតិកាលទី៦ ថ្ងៃព្រហស្បតិ៍ ទី២៨ ខែកក្កដា ឆ្នាំ២០២២ ដោយសំឡេង១០៥ លើ១០៦សំឡេង។

បន្ទាប់ពីច្បាប់នេះត្រូវបានអនុម័តរដ្ឋសភានឹងបញ្ជូនទៅកាន់ព្រឹទ្ធសភាដើម្បីបន្តប្រជុំយល់ព្រម មុននឹងបញ្ជូនទៅអង្គព្រះមហាក្សត្រដើម្បីឡាយព្រះហស្ថលេខាដាក់ឱ្យប្រើប្រាស់ជាផ្លូវការ៕